Skandal pas vdekjes së Matthew Perry

Detaje të reja tronditëse janë zbuluar rreth vdekjes së aktorit të njohur Matthew Perry, ndërsa ish-asistenti i tij personal po përballet me akuza të rënda për fshehje provash dhe përfshirje në përdorimin e ketaminës.

Sipas dokumenteve të prokurorisë federale, Kenneth Iwamasa dyshohet se nisi përpjekjet për të zhdukur gjurmët vetëm pak kohë pasi ylli i serialit “Friends” u gjet pa jetë në shtëpinë e tij në Kaliforni në tetor të vitit 2023.

Hetuesit pretendojnë se ai ka shkatërruar prova fizike dhe materiale digjitale që lidhnin Matthew Perry me përdorimin e ketaminës, ndërsa dyshohet se u ka kërkuar edhe personave të tjerë të fshijnë çdo lidhje me rrjetin që siguronte substancën për aktorin.

Iwamasa ka pranuar fajësinë për përfshirje në shpërndarjen e ketaminës, një çështje që sipas autoriteteve lidhet drejtpërdrejt me vdekjen e aktorit. Edhe pse fillimisht rrezikonte deri në 15 vite burg, pas marrëveshjes me drejtësinë prokurorët po kërkojnë rreth 41 muaj dënim.

Në dosjen hetimore thuhet se ish-asistenti, pa asnjë trajnim mjekësor, i ka administruar disa herë ketaminë Perry-t, madje edhe në orët e fundit para tragjedisë. Autoritetet besojnë se më pas ai është përpjekur të fshehë rolin e tij duke dhënë deklarata kontradiktore dhe duke pretenduar se aktori vetë i kishte fshehur substancat në banesë.

Rasti vazhdon të mbetet një nga më të komentuarit në Hollywood, ndërsa pritet që shumë shpejt të jepet edhe vendimi final për ish-asistentin e Matthew Perry.