Johnny Depp viktimë e një mashtrimi milionash

Aktori i famshëm hollivudian Johnny Depp është bërë pjesë e një skandali financiar, pasi autoritetet hungareze zbuluan një mashtrim të madh që dyshohet se i ka shkaktuar yllit të “Pirates of the Caribbean” humbje prej mbi 600 mijë eurosh.

Sipas raportimeve, një shtetas jordanez është arrestuar në Budapest nën dyshimet se ka përdorur për gati dy vite të dhënat bankare të aktorit pa dijeninë e tij. Hetimi nisi pasi një bankë amerikane sinjalizoi transaksione të pazakonta dhe tërheqje të dyshimta nga llogaria e Depp.

Mediat raportojnë se nga fillimi i vitit 2024 deri në fund të vitit 2025 janë kryer qindra pagesa dhe rezervime online me kartën e aktorit, duke arritur një dëm total prej rreth 620 mijë eurosh.

Sipas hetuesve, i dyshuari kishte arritur të mos binte në sy duke realizuar pagesa më të vogla dhe të shpërndara në kohë, ndërsa përdorte të dhënat e vjedhura për rezervime akomodimi dhe blerje në internet.

Policia arriti të gjurmonte aktivitetin përmes adresave IP, emaileve dhe një numri telefoni të regjistruar në Hungari, gjë që çoi në arrestimin e tij në Budapest.

Gjatë kontrollit në apartamentin ku jetonte, autoritetet sekuestruan pajisje elektronike që dyshohet se janë përdorur në skemën e mashtrimit. Në banesë u gjetën gjithashtu substanca të dyshuara narkotike, duke hapur një hetim shtesë ndaj të arrestuarit.

Edhe pse i dyshuari ka mohuar akuzat, gjykata ka vendosur paraburgim ndaj tij, ndërsa hetimet vazhdojnë për të zbuluar se si u siguruan të dhënat bankare të Johnny Depp.

Ngjarja ka bërë bujë në mediat ndërkombëtare, duke rikthyer edhe një herë vëmendjen te rreziqet e mashtrimeve digjitale, nga të cilat nuk shpëtojnë as yjet më të mëdhenj të Hollywood-it.