Michael Jackson vendos një rekord të paprecedentë

Edhe pse kanë kaluar vite nga ndarja e tij nga jeta, Michael Jackson vazhdon të thyejë rekorde dhe të shkruajë histori në industrinë muzikore.

Mbretit të Pop-it i është shtuar një tjetër arritje e jashtëzakonshme në karrierën e tij legjendare. Jackson është bërë artisti i parë që arrin të ketë këngë debutuese në klasifikimin prestigjioz “Billboard Hot 100” në gjashtë dekada të ndryshme, një rekord që konfirmon ndikimin e tij të pazëvendësueshëm në muzikën botërore.

Arritja erdhi falë këngës “Chicago”, e cila është rikthyer në vëmendjen e publikut dhe është renditur në vendin e 30-të në listën amerikane, duke shënuar hyrjen e parë të Michael Jackson në klasifikimet e dekadës së viteve 2020.

Kënga është pjesë e albumit postum “Xscape”, i publikuar në vitin 2014, dhe ka përjetuar një ringjallje të fortë falë interesit të ri të fansave dhe ekspozimit që ka marrë trashëgimia artistike e Jackson në vitet e fundit.

Nga i njëjti album, sukses kanë njohur edhe këngë të tjera si “Love Never Felt So Good”, në bashkëpunim me Justin Timberlake, si dhe “Slave to the Rhythm”, të cilat kanë lënë gjurmë në klasifikimet muzikore ndërkombëtare.

Ky rekord i ri dëshmon se emri i Michael Jackson vazhdon të mbetet po aq i fuqishëm sa dikur, duke konfirmuar statusin e tij si një nga artistët më ikonë dhe më me ndikim në historinë e muzikës moderne.