Anglia nuk dorëzohet kurrë! Kane shpërthen pas triumfit dramatik: “Gjithçka ishte kundër nesh”

Anglia ka siguruar biletën për në çerekfinalet e Kupës së Botës pas një ndeshjeje spektakolare ndaj Meksikës, duke triumfuar 3-2 në stadiumin legjendar “Azteca”. “Tre Luanët” treguan karakter të jashtëzakonshëm, pasi luajtën pjesën më të madhe të takimit me një futbollist më pak.

Gjithçka u vështirësua për skuadrën e Thomas Tuchel pas kartonit të kuq të Jarell Quansah, por anglezët nuk u dorëzuan. Pavarësisht presionit dhe avantazhit numerik të kundërshtarëve, ata arritën të ruanin qetësinë dhe të siguronin një fitore që i mban në garë për trofeun botëror.

Pas ndeshjes, kapiteni Harry Kane nuk i fshehu emocionet, duke e cilësuar sfidën si një nga më të vështirat që Anglia ka zhvilluar në këtë Botëror.

“Ishte një ndeshje e çmendur. Duhej të luftonim dhe të gjenim një mënyrë për ta fituar. Sapo kam kënduar me tifozët, ndaj mezi flas, por rasti, skuadra, gjithçka ishte kundër nesh. Megjithatë, ne ia dolëm”, u shpreh sulmuesi anglez.

Kane komentoi edhe penalltinë e akorduar për Meksikën pas ndërhyrjes së Jude Bellingham, duke lënë të kuptohet se nuk ishte dakord me disa nga vendimet e arbitrit.

“Mendova se e preka topin i pari. Ishte një nga ato ndeshje ku shumë vendime shkuan kundër nesh, por në fund kjo nuk ka rëndësi. Më e rëndësishmja është që fituam”, deklaroi ai.

Me këtë sukses dramatik, Anglia vazhdon ëndrrën për titullin kampion të botës. Në çerekfinale, skuadra e Thomas Tuchel do të përballet me Norvegjinë, në një tjetër duel që premton emocione të mëdha.