Goditje për Marokun para Francës, saibari nuk luan as sot

Maroku ka marrë një lajm të hidhur vetëm pak orë përpara përballjes së madhe me Francën në çerekfinalen e Kupës së Botës.

Ylli i skuadrës dhe golashënuesi më i mirë i marokenëve, Ismael Saibari, nuk ka arritur të rikuperohet nga dëmtimi dhe do të mungojë në sfidën që luhet këtë mbrëmje në Boston.

Sulmuesi, autor i tre golave në këtë edicion të Botërorit, u dëmtua gjatë ndeshjes së fazës së 1/8-tës ndaj Kanadasë. Edhe pse stafi teknik kishte shpresuar ta kishte në dispozicion për sfidën me Francën, rikuperimi i tij nuk përfundoi në kohë.

Lajmin e konfirmoi trajneri Mohamed Ouahbi, i cili pranoi se Saibari nuk është gati për të zbritur në fushë.

“Saibari nuk do të luajë sot. Shpresojmë ta kemi në dispozicion për ndeshjen e ardhshme”, u shpreh tekniku maroken, duke lënë të kuptohet se beson te kualifikimi i skuadrës së tij në gjysmëfinale.

Nëse Maroku arrin të eliminojë Francën, në fazën gjysmëfinale do të përballet me fituesin e duelit mes Spanjës dhe Belgjikës.