Polifonia shqiptare pushton Hollywood-in

Muzika tradicionale shqiptare do të dëgjohet në një nga produksionet më të mëdha kinematografike të viteve të fundit. Artistët shqiptarë Ervis Rapaj dhe Grupi Argjiro kanë konfirmuar se janë bërë pjesë e filmit “The Odyssey”, me regji të Christopher Nolan, duke sjellë në ekran tingujt autentikë të iso-polifonisë shqiptare.

Ervis Rapaj zbuloi se pati mundësinë të interpretonte kabanë shqiptare dhe të bashkëpunonte ngushtë me kompozitorin fitues të Oscar-it, Ludwig Göransson. Ky i fundit udhëtoi në jug të Shqipërisë për të regjistruar nga afër polifoninë dhe instrumentet tradicionale, të cilat do të përfshihen në kolonën zanore të filmit.

Artisti e cilësoi eksperiencën si një privilegj të jashtëzakonshëm dhe u shpreh krenar që një pjesë e shpirtit të muzikës shqiptare do të prezantohet para publikut në mbarë botën.

Të njëjtin emocion ndau edhe Roland Çenko, drejtuesi i Grupit Argjiro, i cili tha se përfshirja në një projekt të Christopher Nolan është një moment historik për promovimin e polifonisë shqiptare në arenën ndërkombëtare.

Sipas tij, bashkëpunimi me Ludwig Göransson ishte një përvojë unike, ndërsa fakti që kompozitori zgjodhi të regjistronte tingujt autentikë në Shqipëri tregon vlerësimin për trashëgiminë muzikore shqiptare.

Grupi Argjiro, i përbërë nga Roland Çenko, Kastriot Çenko, Alvaro Çenko, Llambro Ballo dhe Juli Zholi, do të sjellë kështu zërin e polifonisë shqiptare në një film që pritet të jetë ndër ngjarjet më të rëndësishme të kinemasë botërore.

Përmes “The Odyssey”, një pjesë e identitetit muzikor shqiptar do të udhëtojë në Hollywood, duke i dhënë traditës sonë një skenë globale.