A$AP Rocky zbulon surprizën për Rihannën

Pas një pritjeje të gjatë nga fansat, duket se muzika e re e Rihannës është më pranë se kurrë. Lajmin e ka konfirmuar partneri i saj, A$AP Rocky, i cili zbuloi se këngëtarja është rikthyer në studio dhe po punon intensivisht për projektet e reja.

Gjatë një interviste në “The Jason Lee Show”, reperi u pyet nëse ai kishte ndikuar në mungesën e albumeve të Rihannës gjatë viteve të fundit. Rocky e mohoi këtë, duke theksuar se artistja është e fokusuar te muzika dhe se aktualisht po punon për materiale të reja.

Megjithatë, ai hodhi poshtë mundësinë e një albumi të përbashkët mes tyre. Sipas A$AP Rocky, secili ka identitetin dhe publikun e vet muzikor, ndaj nuk e sheh si një projekt që do t’u përshtatej të dyve.

Rihanna nuk ka publikuar një album që prej “Anti”, ndërsa këngët e saj më të fundit kanë qenë pjesë e kolonave zanore të filmave “Black Panther: Wakanda Forever” dhe “Smurfs”. Pak muaj më parë, ajo publikoi edhe pamje nga studioja muzikore, duke lënë të kuptohet se po përgatit rikthimin e shumëpritur.

Ndërkohë, muajin e kaluar artistja u rikthye edhe në skenë, duke performuar përkrah Jay-Z në një koncert në New York, performanca e saj e parë live pas tre vitesh. Tashmë fansat presin me padurim të mësojnë se kur do të publikohet projekti i ri muzikor.