Europa nën hijen e eklipsit, miliona njerëz magjepsen nga spektakli qiellor

Një spektakël i rrallë qiellor ka mahnitur miliona njerëz në të gjithë Europën, teksa një eklips diellor solli disa momente errësire në mes të ditës dhe transformoi qiellin në një pamje të jashtëzakonshme.

Spanja ishte ndër destinacionet kryesore për të apasionuarit pas astronomisë, me më shumë se 450 mijë turistë që udhëtuan drejt vendit për ta ndjekur fenomenin. Autoritetet kishin parashikuar që numri i vizitorëve përgjatë zonës së eklipsit të arrinte deri në 6 milionë.

Edhe Islanda u kthye në një pikë të rëndësishme vëzhgimi. Dhjetëra anije turistike u pozicionuan në det, duke u mundësuar rreth 53 mijë pasagjerëve një pamje sa më të qartë të eklipsit.

Në momentin kur eklipsi arriti fazën e plotë, atmosfera ndryshoi brenda pak minutash. Temperaturat ranë, aktiviteti i zogjve u ndërpre dhe errësira mbuloi peizazhin, duke bërë të mundur që yjet të shfaqeshin në qiell edhe pse ishte ende ditë.

Nga Spanja te Islanda, Groenlanda dhe pjesë të Portugalisë, mijëra qytete e fshatra u kthyen në pika vëzhgimi për një prej fenomeneve më spektakolare të natyrës, duke bashkuar njerëz të të gjitha moshave nën të njëjtin qiell.