Nicole Kidman flet për dashurinë pas divorcit

Nicole Kidman ka vendosur të flasë hapur për jetën e saj personale, duke treguar se është gati të nisë një kapitull të ri dhe se nuk e përjashton mundësinë për t’i hapur sërish zemrën dashurisë. Deklaratat e aktores kanë ardhur mes spekulimeve për një romancë të re pas ndarjes nga Keith Urban.

Në një intervistë për British Vogue, fituesja e çmimit Oscar rrëfeu se jeta nuk ka ndjekur rrugën që kishte imagjinuar dikur, por se ka mësuar të pranojë ndryshimet dhe të ecë përpara me shpresë.

Kidman tha se beson te guximi për të provuar gjëra të reja, për të mësuar nga dështimet dhe për të qëndruar gjithmonë e hapur ndaj mundësive që sjell e ardhmja. Sipas saj, edhe momentet më të vështira e kanë ndihmuar të njohë më mirë veten dhe ta shohë jetën me një këndvështrim më pozitiv.

Aktorja pranoi se pas divorcit u ndje e pasigurt dhe e cenueshme, por zgjodhi të mos mbyllej në vetvete. Ajo tregoi se mbështetja e njerëzve të afërt dhe këshillat e mentorëve e ndihmuan të përballej me realitetin e ri dhe të pranonte se jo çdo gjë në jetë shkon sipas planeve.

Ylli i “Practical Magic 2” theksoi gjithashtu se vendimet më të rëndësishme i merr duke ndjekur intuitën dhe emocionet, duke shtuar se gjithmonë është udhëhequr nga zemra dhe jo nga llogaritjet e ftohta.

Deklaratat e saj vijnë vetëm pak javë pasi mediat e fotografuan në Itali në shoqërinë e investitorit Michael Reinstein, duke nxitur zëra për një lidhje të re. Megjithatë, Kidman nuk ka reaguar ndaj këtyre spekulimeve dhe ka zgjedhur të mbajë private jetën e saj sentimentale.

Pas pothuajse dy dekadash martesë me Keith Urban, Nicole Kidman duket e vendosur të shohë drejt së ardhmes me optimizëm, duke lënë të kuptohet se është gati të përqafojë çdo mundësi të re që mund t’i sjellë jeta.