Shakira në mision humanitar, dhuron 1.25 milionë dollarë për shkollat

Shakira ka ndërmarrë një tjetër nismë humanitare në vendlindjen e saj, duke premtuar 1.25 milionë dollarë për rindërtimin e shkollave të dëmtuara nga tërmeti i fuqishëm që goditi Kolumbinë.

Këngëtarja vizitoi Quibdó-n, në provincën Chocó, një prej zonave më të prekura nga fatkeqësia natyrore. Gjatë qëndrimit atje, ajo pa nga afër dëmet në ambientet shkollore, takoi nxënës dhe mësues dhe u njoh me nevojat urgjente të komunitetit.

Tërmeti me magnitudë 7.4 goditi pjesën perëndimore të Kolumbisë më 10 gusht, duke shkaktuar dëme të mëdha. Sipas të dhënave të raportuara, rreth 200 shkolla në zonën e Chocó-s kanë pësuar dëmtime dhe shumë fëmijë janë përballur me vështirësi për t’u rikthyer në mësim.

Shuma prej 1.25 milionë dollarësh është siguruar përmes një bashkëpunimi mes disa institucioneve. Shakira dhe Live Nation kanë kontribuar me 500 mijë dollarë, një shumë tjetër është siguruar nga Fondi Global i Arsimit Qytetar i FIFA-s, ndërsa 250 mijë dollarë janë dhuruar nga CAF, Banka e Zhvillimit për Amerikën Latine dhe Karaibet.

Fondet do të menaxhohen përmes “Fundación Pies Descalzos”, organizatës së themeluar nga Shakira, me synimin për të rikonstruktuar shkollat dhe për t’u krijuar fëmijëve mundësinë që të rikthehen sa më shpejt në bankat e shkollës.

Për Shakirën, kjo nismë është një tjetër dëshmi e lidhjes së fortë me vendin ku u rrit dhe e angazhimit të saj prej vitesh në mbështetje të arsimit dhe fëmijëve në nevojë.