Diddy përmendet në gjyqin për vrasjen e Tupac

Emri i Sean “Diddy” Combs është përfshirë në listën e dëshmitarëve të mundshëm në gjyqin për vrasjen e Tupac Shakur, duke rikthyer në vëmendje një nga misteret më të mëdha të historisë së hip-hopit.

Procesi ndaj Duane “Keffe D” Davis ka nisur në Las Vegas dhe ai mbetet personi i vetëm i akuzuar zyrtarisht për vrasjen e Tupac. Prokuroria pretendon se Davis kishte rol në organizimin e atentatit, ndërsa motivi dyshohet se lidhet me një konflikt të ndodhur vetëm disa orë para të shtënave.

Përfshirja e emrit të Diddy-t ka shkaktuar interes të madh, pasi prej vitesh emri i tij është përmendur në teori dhe pretendime që lidhen me rivalitetin mes kampeve të hip-hopit në vitet ’90. Megjithatë, fakti që ai figuron në listën e dëshmitarëve nuk do të thotë se është i akuzuar apo se prokuroria e konsideron përgjegjës për vrasjen.

Tupac u qëllua më 7 shtator 1996, në Las Vegas, pasi kishte ndjekur ndeshjen e boksit mes Mike Tyson dhe Bruce Seldon. Ai ndodhej në një makinë me Marion “Suge” Knight kur një Cadillac i bardhë u afrua dhe nga automjeti u hap zjarr.

Reperi ndërroi jetë gjashtë ditë më vonë, më 13 shtator 1996, në moshën vetëm 25-vjeçare.

Davis është deklaruar i pafajshëm, ndërsa gjyqi pritet të hedhë dritë mbi rrethanat e atentatit dhe konfliktet që i paraprinë vrasjes së Tupac.

Pas gati tre dekadash mister, çdo emër i ri që shfaqet në këtë proces po rikthen pyetjen që ka mbetur pa përgjigje: kush qëndronte pas vrasjes së Tupac Shakur?