Haaland befason të gjithë, ndryshon look-un pak para nisjes së sezonit

Erling Haaland ka surprizuar fansat vetëm pak orë para startit të sezonit të ri të Premier League, duke u shfaqur me një look krejtësisht të ri.

Sulmuesi i Manchester Cityt, i njohur për flokët e gjatë bjonde dhe stilin karakteristik me shirit në kokë, ka vendosur t’i presë flokët shkurt, duke bërë një ndryshim drastik në pamjen e tij.

Haaland e prezantoi look-un e ri përmes një videoje në rrjetet sociale, të shoqëruar me mesazhin: “Sezoni i ri, pamja e re.”

Reagimet e fansave ishin të menjëhershme. Shumë prej tyre fillimisht menduan se bëhej fjalë për një video të krijuar me inteligjencë artificiale, ndërsa të tjerë e krahasuan me personazhin e filmit “Home Alone”.

Edhe partnerja e tij, Isabel Johansen, u duk e befasuar nga ndryshimi dhe pranoi se do t’i duhej pak kohë për t’u mësuar me pamjen e re të sulmuesit norvegjez.

Para se ta tregonte publikisht, Haaland kishte ndarë modelin e ri edhe me disa prej emrave të njohur të futbollit përmes FaceTime, mes tyre Jack Grealish dhe Zlatan Ibrahimovic. Ky i fundit, në mënyrën e tij karakteristike, e pyeti me shaka nëse Haaland kishte humbur ndonjë bast.

Tashmë, të gjithë sytë janë te Haaland për të parë nëse “pamja e re” do të shoqërohet edhe me një sezon të ri rekordesh dhe golash.