Australia vendos kufij për muzikën e krijuar nga Inteligjenca Artificiale

Inteligjenca Artificiale po ndryshon me shpejtësi mënyrën se si krijohet muzika, por tashmë po përballet edhe me kufizime të reja. Australia ka vendosur që këngët e krijuara tërësisht ose kryesisht nga AI të mos lejohen në klasifikimet zyrtare muzikore të vendit.

Shoqata Australiane e Industrisë së Muzikës, ARIA, ka vendosur që një këngë duhet të jetë “në mënyrë thelbësore e krijuar nga njerëzit” për t’u përfshirë në renditjet muzikore.

Debati u ndez pas një versioni të “Like A Prayer” të Madonna-s, të realizuar nga DJ australian Josh Fawaz. Kënga arriti deri në vendin e parë në klasifikimin dance të ARIA-s dhe u dëgjua më shumë se 48 milionë herë në Spotify. Më vonë u bë e ditur se në produksion ishte përdorur Inteligjenca Artificiale.

Megjithatë, rregullat e reja nuk e ndalojnë përdorimin e AI-së në muzikë. Artistët mund ta përdorin teknologjinë si një mjet ndihmës, për sa kohë që krijimtaria kryesore mbetet njerëzore.

Kjo do të thotë se lejohen përdorime si auto-tune, makinat e baterive dhe AI për masterizim, ndërsa artistët duhet të kenë një rol të rëndësishëm në shkrimin, interpretimin dhe realizimin e këngës.

ARIA kërkon gjithashtu që artistët të deklarojnë nëse kanë përdorur Inteligjencën Artificiale gjatë krijimit të një kënge.

Vendimi australian tregon se industria muzikore po përballet me një debat të ri: ku përfundon teknologjia dhe ku fillon krijimtaria njerëzore? Dhe duket se kjo është vetëm fillimi i rregullave të reja që mund të përhapen edhe në tregje të tjera muzikore.