Kosova mposht Irlandën, Muriqi heroi i mbrëmjes

Mbrëmje magjike në “Fadil Vokrri”! Kombëtarja e Kosovës e ka nisur në mënyrën më të bukur aventurën e saj në UEFA Nations League, duke mposhtur Republikën e Irlandës me rezultatin 1–0, në një sfidë të luftuar deri në sekondat e fundit.

Kosova dominoi pjesën më të madhe të takimit dhe krijoi disa mundësi të rrezikshme, ndërsa portieri irlandez Caoimhín Kelleher mbajti skuadrën e tij në lojë me disa pritje spektakolare. Vedat Muriqi ishte një prej protagonistëve kryesorë të sulmit dhe iu afrua disa herë golit, përpara se të gjente rrjetën në momentin vendimtar.

Në minutën e 81-të, Kelleher bëri një tjetër pritje të jashtëzakonshme ndaj Muriqit. Vetëm një minutë më vonë, Kosova më në fund gjeti golin: Ermal Krasniqi goditi fuqishëm dhe topi u përplas në traversë, ndërsa Muriqi reagoi menjëherë dhe me kokë e dërgoi topin në rrjetë për 1–0.

Minutat e fundit sollën edhe më shumë emocione, me Kosovën që kërkoi golin e dytë dhe Irlandën që tentoi të rikthehej në lojë. Në fund, “Dardanët” e ruajtën avantazhin dhe siguruan tri pikë të rëndësishme në ndeshjen hapëse të Grupit B3.

Një nisje e madhe për Kosovën në Nations League, me Vedat Muriqin që u kthye edhe një herë në heroin e mbrëmjes dhe “Fadil Vokrri”-n që festoi një fitore të paharrueshme.