VESA LUMA SHPËRTHEN PAS AUDIO-PËRGJIMIT TË ARLINDA ZEKajt: “JO VETËM MINISTRJA, POR TË GJITHË DUHET TË JAPIN DORËHEQJE!”

Këngëtarja Vesa Luma ka reaguar ashpër pas publikimit të një audio-incizimi tronditës, ku e ndjera Arlinda Zekaj dëgjohet duke kërkuar ndihmë nga një zyrtar policor, pak ditë para se të vritej në Pejë. Përmes disa postimeve në Instagram, artistja ka shprehur indinjatën e saj për mënyrën se si, sipas bisedës së publikuar, u trajtuan kërkesat e viktimës për mbrojtje.

“E tmerrshmeeeee. Me këtë që dëgjova, more jo ministrja, po komplet prej A deri në ZH duhet me u dorëheq. Nuk po më besohet”, shkroi Vesa, duke kërkuar përgjegjësi përtej një individi të vetëm.

Në një tjetër reagim, këngëtarja iu drejtua drejtpërdrejt zyrtarit policor që përmendet në incizim, duke kritikuar qëndrimin e dëgjuar gjatë komunikimit. Ajo ndau gjithashtu një fotografi nga protestat kundër dhunës ndaj grave, duke rikthyer në vëmendje momentet kur Arlinda kërkonte ndihmë dhe shprehte frikën për sigurinë e saj.

“Sa shumë e pafuqishme u ndjeva sot kur dëgjova zërin e Arjetës që dridhej teksa i përgjërohej ‘Farukut’”, shkroi artistja në postimin e saj, ndërsa bëri thirrje për mbrojtjen e grave që ndodhen në situata të ngjashme.

Por mesazhi i Vesës nuk u kufizua vetëm te zemërimi. Ajo kërkoi edhe mënyra konkrete për t’u angazhuar në mbështetje të grave që përballen me dhunë dhe që kanë nevojë për ndihmë institucionale.

“Ju lutem dikush që është i fushës të na drejtojë neve të paktën që kemi pozicione publike e ndikim në audiencë të bëjmë diçka për këto gra. Si mund të ndihmoj unë?”, ishte thirrja e saj.

Ndërkohë, rasti ka sjellë edhe zhvillime institucionale. Inspektorati Policor i Kosovës ka njoftuar se ka nisur veprime hetimore dhe verifikuese për të shqyrtuar mënyrën se si policia i ka trajtuar raportimet e Arlinda Zekajt, përfshirë komunikimin me të dhe reagimin ndaj kërkesave të saj për ndihmë.

Ngjarja ka rikthyer në qendër të vëmendjes një çështje që shkon përtej një rasti të vetëm: sa efektivë janë mekanizmat e mbrojtjes kur një grua kërkon ndihmë dhe shpreh frikën për jetën e saj?

Reagimi i Vesës është një tjetër zë publik që kërkon llogaridhënie dhe veprime konkrete. Sepse mbrojtja e grave nuk duhet të mbetet vetëm një premtim pas tragjedive, por një përgjegjësi që duhet të përmbushet në kohë.