LIL NAS X DEKLAROHET I PAFAJSHËM PAS AKUZAVE PËR SULM NDAJ POLICISË

Reperi i njohur amerikan Lil Nas X, me emrin e vërtetë Montero Lamar Hill, është paraqitur në gjykatën e Los Angeles, ku është deklaruar i pafajshëm përballë katër akuzave të rënda, përfshirë plagosjen e një oficeri policie dhe rezistencën ndaj arrestimit. Nëse shpallet fajtor, 26-vjeçari rrezikon deri në pesë vite burg.

Sipas autoriteteve, artisti u arrestua javën e kaluar në Studio City, pas një raportimi se po ecte nudo përgjatë Ventura Boulevard. Kur policia ndërhyri, ai dyshohet se ka sulmuar oficerët, duke shkaktuar lëndime tek tre prej tyre.

Pas incidentit, reperi u dërgua në spital për një mbidozë të dyshuar dhe më pas kaloi fundjavën në qeli. Lirimi me kusht iu vendos në shumën 75,000 dollarë (rreth 69,300 euro).

Pamjet e siguruara nga TMZ tregojnë Lil Nas X duke ecur fillimisht në rrugë me të brendshme të bardha dhe çizme kaubojsh, përpara se të shfaqej plotësisht lakuriq, duke iu afruar makinave që kalonin. Çizmet e tij të bardha, të cilat tërhoqën vëmendje të madhe, përfunduan në eBay ku një kalimtar i rastësishëm i nxori në shitje për 10,000 dollarë (rreth 9,240 euro).

Ngjarja vjen vetëm disa muaj përpara publikimit të albumit të tij të dytë, “Dreamboy”, i cili pritet të jetë një nga projektet më të mëdha të këtij viti për artistin.

Fitues i dy çmimeve Grammy dhe autor i superhitit global “Old Town Road”, Lil Nas X është shndërruar në një nga emrat më të përfolur të industrisë muzikore. Përveç suksesit në top-lista, ai është komentuar shpesh edhe për provokimet e tij artistike dhe performancat e guximshme që kanë ndezur debate të shumta në publikun amerikan.