ENERGJI, MOTIVIM DHE HUMOR NË WAVE BREAKFAST SHOW ME ARLINDA RAJTËN DHE KLEDISA PROGNIN

Në episodin e sotëm të Wave Breakfast Show, mikrofoni i Radios Wave u mbush me frymëzim, energji dhe pozitivitet falë dy të ftuarave të veçanta — Arlinda Rajtës dhe Kledisa Prognit.

Pjesa e parë e intervistës iu kushtua Arlinda Rajtës, agjente e Century 21 Metropol East, e cila ndau përvojën dhe filozofinë e saj në botën e shitjeve. Ajo tregoi se puna në kompani të vogla ka qenë një “shkollë jete”, pasi i ka dhënë mundësinë të mësojë nga çdo aspekt i procesit – nga marketingu te ndërtimi i marrëdhënieve me klientët. “Qëndro besnik në punët e vogla që të të besohen punë të mëdha,” – ishte mesazhi i saj motivues për të gjithë ata që duan të rriten profesionalisht.

Duke prekur edhe temën e dallimeve gjinore në shitje, Arlinda vuri re se vajzat janë më të kujdesshme ndaj detajeve, ndërsa djemtë sjellin më shumë energji dhe vetëbesim – një kombinim që, sipas saj, krijon ekuilibrin perfekt në çdo ekip. Mbi të gjitha, ajo e përkufizon transparencën me klientin si gurin e themelit të suksesit: “Vetëm duke qenë i hapur dhe i ndershëm mund të fitosh besimin dhe respektin e klientit.”

Në pjesën e dytë të programit, atmosfera u bë plot humor me Kledisa Prognin, vajzën e gjatë, elegante dhe plot energji pozitive që njihet si ish-Miss Adoleshenca. Tema e ditës ishte “Gjatësia: avantazh apo problem?”, ku Kledisa ndau me buzëqeshje mendimin e saj se gjatësia është një veçori që e ka kthyer në avantazh.

“Ka pak vajza të gjata… dhe po, edhe pak djem të gjatë,” – tha ajo me humor, duke e kthyer temën në një moment gazmor që bëri të qeshë gjithë studion. Ajo rrëfeu edhe një episod të këndshëm nga udhëtimi në Itali, kur në Coloseo, pasi komentoi shërbimin me shoqërinë, zbuloi se kamarierët ishin shqiptarë — një situatë që u kthye në të qeshura spontane mes miqsh.

Në fund, Kledisa la një mesazh të fortë pozitiviteti:

“Bukuria nuk matet me centimetra, por me mirësinë dhe qëndrimin që kemi ndaj të tjerëve. E rëndësishme është të jemi njerëz të mirë brenda – sepse ajo është gjatësia që vlen më shumë.”

Dy histori ndryshe, dy gra frymëzuese, një mëngjes plot reflektim, buzëqeshje dhe energji në Wave Breakfast Show – aty ku dita nis gjithmonë me shpirt pozitiv.