BEN STILLER HAP ZEMRËN NË NJË DOKUMENTAR PËR PRINDËRIT E TIJ TË FAMSHËM

Ben Stiller po kthehet në ekran, këtë herë jo për një komedi, por me një rrëfim emocional që vjen nga thellësia e përvojës së tij personale. Dokumentari i tij më i ri, “Stiller & Meara: Nothing is Lost”, që pati premierën në Festivalin e Filmit në New York, sjell një udhëtim të sinqertë në jetën e aktorit, i cili rrëfen periudha të vështira pas humbjes së babait të tij dhe ndarjes nga bashkëshortja Christine Taylor.

Në film, 59-vjeçari tregon se pavarësisht suksesit profesional, ai ndiente mungesë ekuilibri në jetën personale. “Gjërat nuk ishin mirë… ndihesha i shkëputur nga familja dhe pak i humbur,” rrëfen Stiller. Pikërisht kjo periudhë reflektimi e çoi drejt rikthimit te rrënjët – te prindërit e tij të famshëm, Jerry Stiller dhe Anne Meara, një nga dyshet më të dashura të humorit amerikan.

Dokumentari përfshin pamje dhe audio arkivore të rralla, ku shfaqet energjia dhe dashuria mes prindërve të tij – që u takuan në vitin 1953 dhe qëndruan bashkë për më shumë se gjashtë dekada, deri në vdekjen e Meara-s në 2015. “Ata e gjetën njëri-tjetrin dhe ishin aty për njëri-tjetrin. Ndihem sikur janë rilidhur,” thotë Stiller me emocion, duke kujtuar edhe humbjen e babait të tij në vitin 2020.

“Stiller & Meara: Nothing is Lost” do të shfaqet në disa kinema duke filluar nga 17 tetori dhe do të jetë i disponueshëm në Apple TV+ më 24 tetor — një histori prekëse për dashurinë, familjen dhe mënyrën si arti mund të bashkojë edhe pas dhimbjes.