AKTORI DYLAN WALSH DHE FAMILJA E TIJ PËRJETOJNË NJË AKSIDENT TË RËNDË NË NEW JERSEY

Aktori i njohur i serialit “Nip/Tuck”, Dylan Walsh, 61 vjeç, ka kaluar momente të frikshme këtë fundjavë, pasi ai dhe familja e tij u përfshinë në një aksident automobilistik në Rumson, New Jersey.

Sipas raportimeve të TMZ, automjeti i tyre, një Ford Explorer 2022, doli nga kontrolli dhe u përplas fillimisht me një shtyllë elektrike, duke shkaktuar dëme serioze në pjesën e përparme të makinës. Pas goditjes së parë, automjeti vazhdoi lëvizjen dhe përfundimisht u përplas edhe në një tjetër shtyllë shërbimi.

Policia e Rumson ka sqaruar se makina po udhëtonte drejt veriut rreth orës 17:00, përpara se të devijonte papritur në korsinë jugore, duke shkaktuar aksidentin. Ende nuk është bërë e qartë se kush ishte pas timonit në momentin e përplasjes.

Nga pesë pasagjerët që ndodheshin në makinë, dy u transportuan në Riverview Medical Center për shkak të dhimbjeve, ndërsa pjesa tjetër e familjes ka shpëtuar pa lëndime të rënda. Për fat të mirë, të gjithë janë jashtë rrezikut dhe po rikuperohen.

Familja e aktorit ka shprehur mirënjohje për reagimin e shpejtë të policisë, zjarrfikësve dhe stafit mjekësor, të cilët ndërhynë menjëherë pas incidentit.

Ky aksident ndodh në një moment të vështirë për Walsh, pasi më pak se një muaj më parë humbi kolegun dhe ish-bashkëshortin në “Nip/Tuck”, aktorin Julian McMahon, i cili ndërroi jetë pas një beteje me kancer në moshën 56-vjeçare.