Boy George trondit muzikën: “Kam bërë pesë albume me inteligjencë artificiale”

Ikona e muzikës pop Boy George ka ndezur debat në industrinë muzikore pasi pranoi se përdor inteligjencën artificiale në procesin e tij krijues, madje duke zbuluar se me ndihmën e saj ka punuar në disa albume.

Kantautori britanik dhe vokalisti i grupit legjendar Culture Club tha se teknologjia është bërë një pjesë e rëndësishme e mënyrës se si ai shkruan muzikë sot.

Sipas tij, inteligjenca artificiale nuk duhet parë si kërcënim për artistët. Përkundrazi, ai e konsideron atë një mjet që e ndihmon të zhvillohet si kompozitor.

“Kam shkruar pesë albume me ndihmën e inteligjencës artificiale. Është fantastike dhe nuk ka asgjë për t’u frikësuar. Gjithmonë them: nëse një robot mund të të zëvendësojë, atëherë nuk je përpjekur mjaftueshëm”, u shpreh ai gjatë një interviste në podcastin Happy Place të prezantueses Fearne Cotton.

Gjatë turneut të fundit me Culture Club në shkurt, Boy George zbuloi gjithashtu se shpesh zhvillon “biseda kreative” me ChatGPT për të përmirësuar tekstet e këngëve.

“Unë i them: ‘Ky varg nuk është i mirë, kjo nuk është ajo që do të thoja unë’. Mund ta drejtosh dhe ta kontrollosh”, shpjegoi ai, duke shtuar se kritikat për përdorimin e teknologjisë nuk e shqetësojnë aspak.

Debati për inteligjencën artificiale në muzikë është ndezur edhe nga artistë të tjerë. Legjenda e skenës Liza Minnelli së fundmi mbrojti përdorimin e saj në krijimin e këngës EDM “Kids Wait Till You Hear This”, duke sqaruar se IA u përdor vetëm për aranzhimet dhe jo për vokalin.

Në anën tjetër, ka edhe zëra kritikë. Këngëtarja SZA paralajmëron se teknologjia mund të krijojë probleme serioze për industrinë, duke thënë se ndihet sikur është “në luftë me inteligjencën artificiale”, sidomos për mënyrën se si ajo imiton stilin e artistëve të ndryshëm.

Ndërkohë që disa e shohin IA-në si revolucion kreativ, të tjerë frikësohen për ndikimin e saj në autenticitetin e muzikës. Një gjë është e sigurt: debati sapo ka filluar.