CARDI B PËRBALLET ME PADI PËR GODITJEN ME MIKROFON NË KONCERTIN E LAS VEGAS

Reperja e njohur botërisht Cardi B po përballet me një padi civile nga një grua nga Ohio, e cila pretendon se është goditur me mikrofon nga artistja gjatë një performance në Las Vegas, në korrik të vitit 2023.
Paditësja, e identifikuar si Jane Doe, kërkon dëmshpërblim për dëmtime fizike dhe emocionale, duke deklaruar se akti i Cardi B ishte i qëllimshëm, agresiv dhe krejtësisht i pajustifikuar.
Sipas dokumenteve të gjykatës, incidenti ndodhi gjatë një koncerti në “Drai’s Beachclub”, ku temperatura ishte shumë e lartë dhe vetë Cardi kishte inkurajuar publikun të spërkatte ujë për t’u freskuar. Por sipas padisë, në momentin që paditësja spërkati pak pije në drejtim të skenës, Cardi reagoi me nervozizëm dhe hodhi mikrofonin në drejtim të saj, duke e goditur në pjesën e sipërme të trupit.

Padia përshkruan incidentin si “sulm dhe rrahje”, duke përfshirë edhe akuza për neglizhencë ndaj stafit të klubit dhe menaxhmentit të ngjarjes. Sipas paditëses, ngjarja nuk ishte e izoluar, pasi një incident i ngjashëm kishte ndodhur një natë më parë në të njëjtin vend.

Një tjetër detaj që përmendet në padi është fakti se mikrofoni i përdorur në incident është shitur më vonë në ankand për 99,000 dollarë – një veprim që paditësja e quan “shtim i vuajtjes emocionale” dhe tallje me situatën.
Ndërkohë, policia vendase e kishte mbyllur rastin në atë kohë për mungesë provash dhe kishte vendosur të mos ngrinte akuza penale ndaj reperes. Por padia civile mbetet e hapur dhe kërkon dëmshpërblim monetar, ndërsa thekson se askush, përfshirë personazhet e famshëm, nuk është mbi ligjin.

As Cardi B, as përfaqësuesit e saj ligjorë nuk kanë dhënë ende një reagim zyrtar lidhur me padinë.