CARDI B PËRBALLET ME PAPARACËT PAS GJYQIT DHE I GJUAN ME STILOLAPS

Reperja e njohur Cardi B u përball me një situatë të tensionuar jashtë gjykatës në Los Angeles të martën, pasi një paparac e pyeti në lidhje me thashethemet virale për një shtatzëni të mundshme. Në një video që po qarkullon në rrjetet sociale, një fotograf iu afrua artistes ndërsa ajo po largohej, duke e pyetur për pretendimet se ish-partneri i saj Offset po mburrej se “e ka lënë shtatzënë për herë të katërt”.

Paparaci gjithashtu e ngacmoi duke i bërë një pyetje të drejtpërdrejtë nëse “parashikon ndonjë problem atësie me Stefon Diggs”, futbollistin me të cilin Cardi është lidhur romantikisht që nga qershori. Reperja reagoi menjëherë duke rrëmbyer një stilolaps nga dora e një fansi dhe e hodhi drejt paparacit, ndërsa e qortoi për “mungesë respekti”.

Teksa po ngjitej në automjetin e saj të shoqëruar nga truproja, burri bërtiti: “Unë ende të dua edhe pse më gjuajte”, ndaj të cilit Cardi iu përgjigj shkurt: “Mos e bëj këtë”. Ky episod pason betejën e saj të fundit ligjore, ku Cardi B u shpall e pafajshme në një çështje civile dhe doli fituese në një gjyq prej 24 milionë dollarësh.