CELINE DION PO PREGATITET PËR NJË RIKTHIM TRIUMFUES NË SKENË

Pavarësisht sëmundjes së saj, diva e muzikës Celine Dion nuk është dorëzuar nga karriera dhe planifikon të rikthehet së shpejti në skenë. Sipas Mirror.uk, këngëtarja 57-vjeçare po punon pa u lodhur për të rifituar zërin dhe qëndrueshmërinë, në mënyrë që të ngjitet përsëri para publikut. Burimet zbulojnë se ajo është shumë pranë qëllimit dhe planifikon një rikthim të madh vitin e ardhshëm. Dion, e cila në dhjetor 2022 zbuloi se po përballej me sindromën shkatërruese të personit të ngurtë, po shërohet më mirë nga sa pritej. “Ajo është shumë mirë, shëndeti i saj është i mirë dhe po arrin përsëri notat e larta. Ajo po ushtrohet lehtë në shtëpi dhe vazhdon me fizioterapi për të trajtuar sëmundjen e saj. Ajo po lëviz mirë dhe zëri i saj tingëllon bukur, falë të gjitha ushtrimeve vokale që po bën. Njerëzit nuk mund ta besojnë se po shërohet kaq shpejt. Sigurisht, ajo ende ka ditët e saj të këqija, por po bëhet më e fortë”, tha një burim për median. Së fundmi, këngëtarja publikoi edhe një video në të cilën shfaqej duke kërcyer në studio, teksa dëgjonte një remiks të këngës “A New Day” nga Sebastian Ingrosso, ku ajo vetë këndon.

Ky remiks shihet si një hap i parë drejt rikthimit të saj, me burimet që theksojnë se Dion synon të performojë përsëri në vitin e ardhshëm. “Është ëndrra e saj dhe po punon shumë për ta bërë realitet. Po bën çmos për të përshpejtuar rikthimin e saj”, tha burimi. Kujtojmë se Dion u detyrua të anulonte turneun botëror “Courage World Tour” tre vite më parë, për shkak të SPS-së së rëndë, një çrregullim i rrallë nervor që shkakton ngurtësi dhe spazma muskulore, duke e bërë të vështirë ecjen. Megjithatë, pavarësisht spazmave muskulore, ajo arriti të performonte drejtpërdrejt “Hymne a l’amour” në ceremoninë e hapjes së Lojërave Olimpike Verore 2024 në Paris. Ky moment mbresëlënës erdhi pas një dekade të vështirë për këngëtaren, që përfshiu edhe humbjen e bashkëshortit të saj nga kanceri në fyt në vitin 2016, duke e lënë të rrisë e vetme tre djemtë e tyre.