CHRIS HEMSWORTH ZBULON RREZIKUN GENETIK PËR ALZHEIMER: “NJË PIKË KTHESE NË JETËN TIME”

Chris Hemsworth ka rrëfyer për Sky News se momenti kur mësoi se kishte një rrezik të lartë për të zhvilluar sëmundjen e Alzheimerit ishte një nga ngjarjet më vendimtare të jetës së tij.

Në sezonin e parë të serialit dokumentar Limitless: Live Better Now të National Geographic, aktori australian zbuloi se, përmes një testi gjenetik, kishte dy kopje të gjenit APOE4 – një faktor që e bën biologjikisht 8 deri në 10 herë më të prirur se një person mesatar për të zhvilluar sëmundjen gjatë jetës.

Fillimisht, Hemsworth kishte pranuar të merrte pjesë në program si një “derr eksperimental” për të provuar sfida fizike e mendore. Por rezultati i testit e vendosi përballë një realiteti të papritur. Sipas studimeve, një në 50 persona trashëgojnë dy kopje të këtij gjeni, dhe pothuajse të gjithë tregojnë shenja të hershme të sëmundjes – që shpesh çon në demencë – para moshës 55 vjeç.

Ekspertët theksojnë se rreziku mund të zvogëlohet me një stil jete të shëndetshëm: shmangien e duhanit, kufizimin e alkoolit, aktivitetin fizik të përditshëm, kontrollin e kolesterolit dhe presionit të gjakut, si dhe një dietë të ekuilibruar.

“Ishte një moment ku kuptova se pjesë të identitetit tim mund të mos ishin më të vlefshme,” tha aktori. “Të shtyn të pyesësh veten pse e bën atë që bën, çfarë kërkon dhe çfarë ofron… në vend që të mendosh vetëm për atë që fiton.”

Pas këtij zbulimi, ylli i “Thor” është fokusuar më shumë në jetën e tij personale, duke u përpjekur të maksimizojë kohën me familjen dhe miqtë, si dhe të jetojë me qëllim e vetëdije më të madhe.