Çmimet marramendëse të biletave për Botërorin 2026 ndezin revoltë globale mes tifozëve

Botërori 2026 ende pa nisur ka hyrë në qendër të kritikave, pasi listat e reja të çmimeve të biletave kanë shkaktuar zemërim të gjerë tek tifozët. Shifrat e publikuara kapin nivele shumë më të larta se ato të premtuara fillimisht nga FIFA, me disa kategori që arrijnë deri mbi 8 mijë dollarë, duke e bërë pjesëmarrjen në ndeshjet më prestigjioze pothuajse të paarritshme për publikun e zakonshëm.

Organizata ndërkombëtare e tifozëve FSE ka reaguar ashpër, duke i cilësuar këto çmime si “zhvatëse” dhe “tradhti monumentale”. Në deklaratën e tyre, ata i bënë thirrje FIFA-s të pezullojë menjëherë shitjet dhe të rishikojë politikat e tarifimit, duke paralajmëruar se kjo situatë po dëmton besimin e tifozëve në turneun më të rëndësishëm të futbollit botëror.

Megjithë reagimet e forta, FIFA ka vijuar me fazën e tretë të aplikimeve për bileta, e cila funksionon përmes një shorti të rastësishëm. Tifozët, ndërkohë, janë të zhgënjyer jo vetëm nga çmimet, por edhe nga mungesa e garancisë se do të përzgjidhen për ndeshjet që dëshirojnë. Kjo ka shtuar ndjesinë e pasigurisë dhe frustrimit në një proces që për shumëkënd duhet të ishte transparent dhe i drejtë.

Ndërsa presioni publik po rritet, FIFA gjendet përballë një sfide serioze për rikthimin e besimit të tifozëve dhe shmangien e një skandali të mundshëm përpara fillimit të Botërorit 2026.