Demi Lovato anulon koncerte dhe flet për lodhjen e skajshme
Written by radio wave on February 12, 2026
Demi Lovato ka tronditur fansat me një njoftim të papritur, duke anuluar disa nga koncertet e turneut të saj të shumëpritur “It’s Not That Deep”. Këngëtarja amerikane pranoi publikisht se arsyeja lidhet me shëndetin dhe mbingarkesën, duke ndezur shqetësime për gjendjen e saj fizike dhe emocionale.
Përmes një postimi në Instagram Story, Lovato u shpreh se mezi pret rikthimin në skenë, por se përgatitjet për turneun e kanë bërë të kuptojë se kishte marrë përsipër më shumë sesa mund të përballonte.
“Lovatikët e mi, jam shumë e emocionuar që do të rikthehem në skenë këtë vit, por e kuptova se e kisha mbingarkuar axhendën time,” shkroi ajo, duke lënë të kuptohet se presioni i madh dhe ritmi i fortë i punës kanë ndikuar drejtpërdrejt në shëndetin e saj.
Sipas këngëtares, i duhet më shumë kohë për pushim dhe prova, në mënyrë që të japë maksimumin në çdo koncert. Vendimi për të riorganizuar turneun u mor për të shmangur lodhjen ekstreme dhe për të ruajtur nivelin e performancës për publikun.
Si pasojë, janë anuluar koncertet e planifikuara në Charlotte, Nashville, Atlanta, Las Vegas dhe Denver, ndërsa koncerti në Orlando është shtyrë për më 13 prill, ku pritet të nisë zyrtarisht turneu.
“Më vjen jashtëzakonisht keq që nuk do të mund t’ju shoh dhe u kërkoj ndjesë të gjithëve që kishin planifikuar të vinin,” tha ajo, duke falënderuar fansat për mbështetjen.
Ky zhvillim ka rikthyer në vëmendje historinë e vështirë të Demi Lovato me shëndetin gjatë turneve. Gjatë turneut “Holy Fvck” në vitin 2022, ajo kishte zbuluar se ndihej aq keq sa mezi ngrihej nga shtrati, madje duke lënë të kuptohet se ai mund të ishte turneu i saj i fundit.
Vendimi i fundit ka ngritur pikëpyetje mbi presionin ekstrem në industrinë e muzikës dhe çmimin që artistët paguajnë për suksesin global, ndërsa fansat presin me ankth rikthimin e saj të plotë dhe të shëndetshëm në skenë.
