Dua Lipa, Taylor Swift dhe Charli XCX ndihmojnë rritjen e ekonomisë britanike me mbi 9 miliardë euro

Muzika britanike po përjeton një bum ekonomik falë yjeve si Dua Lipa, Taylor Swift dhe Charli XCX, të cilat kanë gjeneruar rreth 9.04 miliardë euro në vitin 2024, sipas raportit vjetor të UK Music.

Këngëtarja shqiptaro-britanike Dua Lipa udhëhoqi këtë rritje me albumin e saj të suksesshëm Radical Optimism dhe turneun botëror që solli të ardhura të mëdha nga eksportet muzikore. Ndërkohë, Taylor Swift shënoi një tjetër rekord me turneun e saj të famshëm Eras, ku mbi 1.2 milion fansa ndoqën koncertet në Edinburg, Liverpool, Cardiff dhe Londër.

Edhe Charli XCX kontribuoi ndjeshëm me albumin Brat, i cili u kthye në një fenomen kulturor dhe gjeneroi të ardhura të konsiderueshme nga streaming, shitjet dhe shkarkimet digjitale, duke e çuar totalin e fitimeve të industrisë së regjistrimeve në 1.7 miliardë euro.

Sipas raportit, ky sukses solli 4,000 vende të reja pune, duke e çuar numrin e punonjësve me kohë të plotë në industrinë muzikore britanike në mbi 220,000.

Megjithatë, drejtuesit e industrisë paralajmërojnë për sfidat e ardhshme, veçanërisht nga inteligjenca artificiale dhe vështirësitë për turnetë evropiane pas Brexit-it.
Shefi Ekzekutiv i UK Music, Tom Kiehl, deklaroi se është jetike që qeveria të ndërhyjë për të mbrojtur krijimtarinë dhe të drejtat e artistëve britanikë.

Edhe Sir Elton John dhe Simon Cowell kanë kërkuar rishikimin e rregullave të të drejtave të autorit për të parandaluar shfrytëzimin e muzikantëve nga kompanitë e mëdha teknologjike që përdorin inteligjencën artificiale në mënyrë të pakontrolluar.