Familja e Chuck Norris shpërthen ndaj lajmeve të rreme: Paralajmërohet padi për videot me AI

Familja e aktorit të ndjerë Chuck Norris ka reaguar ashpër ndaj një vale mesazhesh dhe videosh të krijuara nga inteligjenca artificiale, të cilat po qarkullojnë në rrjet dhe pretendojnë se zbulojnë “të vërtetën” mbi rrethanat e vdekjes së tij.

Përmes një deklarate të publikuar në llogarinë zyrtare të Instagram-it të Norris, familja ka paralajmëruar se po shqyrton mundësinë e një padie ndaj personave apo platformave që po shpërndajnë përmbajtje të rreme dhe mashtruese.

Sipas tyre, këto materiale përfshijnë histori të sajuara mbi gjendjen e tij shëndetësore në të kaluarën, si dhe spekulime të pavërteta që lidhen me marrëdhëniet familjare. Familja thekson se këto pretendime nuk kanë asnjë bazë dhe po përdoren vetëm për klikime dhe sensacion.

Në deklaratë, ata u bëjnë thirrje ndjekësve që të mos besojnë dhe të mos shpërndajnë asnjë informacion që nuk vjen drejtpërdrejt nga familja ose një zëdhënës zyrtar.

Chuck Norris, i njohur botërisht për filmat aksion dhe rolin ikonik në serialin “Walker, Texas Ranger”, u nda nga jeta muajin e kaluar në moshën 86-vjeçare. Ndërkohë, shkaku i vdekjes së tij ende nuk është bërë publik, çka ka nxitur edhe më shumë spekulime në rrjete sociale.