GAL GADOT E BEFASUAR NGA REAGIMET PAS MBËSHTETJES SË IZRAELIT

Aktorja izraelite Gal Gadot ka pranuar se ishte e tronditur nga reagimet e publikut pasi shprehu mbështetjen e saj për politikat e Izraelit.

“Unë u trondita nga kaq shumë urrejtje dhe sa shumë njerëzit mendojnë se e dinë kur në të vërtetë nuk e dinë dhe sa shpesh media është e padrejtë, kështu që më duhej të flisja,” tha ajo në një intervistë për revistën Variety.

Më 7 tetor 2023, Gal Gadot bëri një deklaratë në mediat sociale, duke shprehur mbështetjen e saj për Izraelin dhe duke u bërë thirrje të tjerëve të bëjnë të njëjtën gjë. “Bota nuk mund të rrijë dhe të shikojë sesi ndodhin këto akte të tmerrshme terrori,” shtoi ajo.

Aktorja theksoi se, përveçse është një artiste që dëshiron të argëtojë njerëzit, ndjeu nevojën të fliste në një moment të rëndësishëm. “Megjithatë, më 7 tetor, kur njerëzit u rrëmbyen nga shtëpitë dhe shtretërit e tyre – burra, gra, fëmijë, të moshuar, të mbijetuar të Holokaustit, ata po kalonin tmerr dhe unë nuk mund të heshtja,” tha ajo.

Së fundmi, Gal Gadot mori një yll në Hollywood Walk of Fame, një moment i rëndësishëm në karrierën e saj. Megjithatë, ceremonia u ndërpre nga demonstrues pro-palestinezë, të cilët protestuan kundër saj, duke pretenduar se ajo duhet të ndjente turp për qëndrimin e saj politik.