Granit Xhaka i zhgënjyer pas fishkëllimave në Prishtinë

Pas barazimit 1:1 mes Zvicrës dhe Kosovës në stadiumin “Fadil Vokrri”, kapiteni i helvetikëve, Granit Xhaka, ka reaguar për një moment që e lëndoi më shumë se rezultati – fishkëllimat e tifozëve gjatë lojës.

Në një intervistë për gazetën zvicerane 20 Minuten, Xhaka u shpreh qartë se nuk e kishte imagjinuar kurrë diçka të tillë, sidomos në një stadium ku ai ndihet “si në shtëpi”.

“Jam definitivisht i befasuar, është gjëja e fundit që kam pritur, posaçërisht këtu në shtëpi. Të them të drejtën, kjo më dhemb, por duhet ta pranoj dhe të përqendrohem te futbolli,” deklaroi ai.

Ndeshja ishte e fortë emocionalisht për të dyja palët, por megjithatë Zvicra arriti objektivin: kualifikimin direkt për Kupën e Botës 2026, që do të zhvillohet në SHBA, Kanada dhe Meksikë.

Nga ana tjetër, Kosova ndodhet në një rrugë më të vështirë dhe do të duhet të provojë fatin në fazën e playoff-it në mars të vitit të ardhshëm.

Reagimi i Xhakës ka hapur diskutime të shumta si në Kosovë, ashtu edhe në Zvicër — duke rikthyer në qendër të vëmendjes temën e raporteve emocionale, sportive dhe identitare mes futbollistit dhe tifozëve.