IRLANDA, SPANJA DHE SLLOVENIA KËRCËNOJNË ME TËRHEQJE NGA EUROVISION 2026 NËSE IZRAELI MERR PJESË

Eurovision 2026 rrezikon të përballet me një krizë pjesëmarrjeje, pasi disa vende kanë bërë të qartë kundërshtimin e tyre ndaj përfshirjes së mundshme të Izraelit në garë.

Në një deklaratë zyrtare, transmetuesi kombëtar RTE tha se Irlanda nuk do të marrë pjesë në Festivalin e Këngës nëse Izraeli lejohet të vazhdojë të jetë pjesë e kompeticionit. “Vendimi përfundimtar do të merret pasi të ketë një vendim nga EBU (Bashkimi Evropian i Transmetimeve), por pjesëmarrja e Irlandës do të ishte e paarsyeshme duke pasur parasysh humbjen e vazhdueshme dhe të tmerrshme të jetëve në Gaza”, thuhet në deklaratë.

Ndërkohë, Ministri i Kulturës së Spanjës, Ernest Urtasun, hapi publikisht derën e tërheqjes së vendit të tij nëse Izraeli nuk përjashtohet, duke shtuar presionin mbi organizatorët e Eurovisionit.

Nga ana tjetër, transmetuesi publik i Sllovenisë, RTV Slovenija, njoftoi të premten se vendi nuk do të marrë pjesë në Eurovision 2026 në rast se Izraeli lejohet të rikthehet në garë.

Këto zhvillime rrisin tensionin brenda familjes së Eurovisionit, ndërsa EBU pritet të marrë një vendim përfundimtar mbi pjesëmarrjen e Izraelit, çështje që tashmë ka ndezur debate politike dhe etike në mbarë Evropën.