Islanda i bashkohet valës së bojkoteve: Eurovision 2026 përballet me krizën më të madhe të viteve të fundit

Eurovision 2026 po hyn në një nga sezonet më të trazuara në historinë e tij, teksa Islanda u bë vendi i pestë që zyrtarisht tërhiqet nga gara. Shkak është vendimi i organizatorëve për të lejuar Izraelin të marrë pjesë, gjë që ka shkaktuar reagime të gjera në skenën muzikore europiane.

Pas Spanjës, Sllovenisë, Holandës dhe Irlandës, edhe televizoni publik islandez RÚV njoftoi se nuk do të marrë pjesë. Institucioni deklaroi se pjesëmarrja është e pamundur në një atmosferë tensioni, mungese gëzimi dhe paqeje, elemente që sipas tyre përbëjnë vetë frymën e Eurovisionit.

Burime brenda RÚV bëjnë të ditur se presioni publik ka qenë i lartë, ndërsa artistët islandezë kanë kërkuar prej muajsh që vendi të distancohet nga festivali. Vendimi i tyre pritet të ndikojë edhe te shtetet e tjera që po ndjekin me shqetësim zhvillimet.

Megjithatë, jo të gjitha vendet ndajnë të njëjtin qëndrim. Polonia, Gjermania dhe Austria konfirmuan pjesëmarrjen, duke theksuar se Eurovision duhet të mbetet një garë apolitike dhe e fokusuar vetëm te muzika. Sipas tyre, festivali nuk duhet të shndërrohet në arenë konfliktesh politike, por të ruajë karakterin e tij si një hapësirë bashkimi kulturor.

Me pesë shtete tërhequr dhe disa të tjera që vëzhgojnë situatën me kujdes, Eurovision 2026 tashmë duket më i pasigurt se kurrë. A do të arrijë festivali më i madh europian i muzikës të ruajë unitetin e tij apo do të përballet me bojkotime të tjera? Vitet e fundit kanë treguar se, pavarësisht synimit për të mos qenë politik, Eurovision mbetet shpesh në qendër të debatit ndërkombëtar.