Katy Perry humb betejën për emrin

Ylli amerikan i muzikës pop, Katy Perry, ka humbur një betejë të gjatë ligjore në Australi lidhur me përdorimin e emrit të saj në industrinë e veshjeve.

Gjykata vendosi në favor të stilistes australiane Katie Perry, e cila kishte krijuar markën e saj të modës që në vitin 2007. Sipas vendimit, përdorimi i këtij emri për shitjen e rrobave nuk shkel ligjin e markave tregtare dhe nuk dëmton reputacionin e këngëtares.

Mosmarrëveshja nisi në vitin 2009, kur ekipi i këngëtares kërkoi që stilistja të ndalonte përdorimin e emrit për markën e saj. Çështja u përshkallëzua në gjykatë në vitin 2019, pasi stilistja pretendoi se shitja e produkteve të këngëtares gjatë turneut në Australi shkelte markën e saj tregtare.

Pas më shumë se një dekade përplasje ligjore, gjykata arriti në përfundimin se konsumatorët nuk do t’i ngatërronin dy emrat dhe se marka e stilistes mund të vazhdojë të përdoret për veshje.