KOSOVA TRIUMFON NDAJ SUEDISË NË KUALIFIKIMET PËR KUPËN E BOTËS 2026

Kombëtarja e Kosovës ka arritur një fitore të madhe në ndeshjen e dytë kualifikuese për Kupën e Botës 2026, duke mposhtur Suedinë me rezultat 2-0 në stadiumin e saj.

Që nga minutat e para, Kosova tregoi karakter të fortë, rezistencë në mbrojtje dhe rrezikshmëri të lartë në kundërsulme. Epërsia erdhi herët, në minutën e 13-të, kur Elvis Rexhbecaj shënoi pas një situate një për një me portierin suedez Robin Olsen.

Skuadra e drejtuar nga Franco Foda nuk u tërhoq pas golit dhe vazhdoi presionin ndaj kundërshtarit. Në minutën e 40-të, Vedat Muriqi realizoi një super gol për 2-0 pas një kombinimi të shkëlqyer me Albion Rrahmanin, duke ngritur në këmbë tifozët në stadium.

Në pjesën e dytë, Kosova tregoi disiplinë të jashtëzakonshme taktike dhe menaxhoi me sukses rezultatin. Florent Muslija ishte pranë golit të tretë pas një depërtimi të bukur, por topi përfundoi jashtë pranë shtyllës. Nga ana tjetër, suedezët patën një mundësi të artë në minutën e 84-të me Alexander Isak, por portieri Arijanet Muric reagoi në mënyrë fantastike.

Kosova e mbylli ndeshjen me dhjetë lojtarë, pasi Lindon Emërllahu u ndëshkua me karton të kuq. Megjithatë, rezultati mbeti i pandryshuar dhe Kosova siguroi fitoren e parë në këtë cikël kualifikues, duke lënë pas humbjen zhgënjyese ndaj Zvicrës.

Një fitore që jo vetëm i jep tre pikë të rëndësishme, por edhe ngrit moralin e skuadrës për vazhdimin e garave.