Liderët europianë kërkojnë marrëveshje për përdorimin e aseteve ruse të ngrira për Ukrainën

Takimet e zhvilluara në Downing Street, Londër, sollën një front të përbashkët të liderëve europianë në mbështetje të Ukrainës, teksa kërkojnë të arrijnë një marrëveshje për përdorimin e aseteve ruse të ngrira për të financuar qëndrueshmërinë ekonomike dhe ushtarake të Kievit.

Sipas burimeve diplomatike, bisedimet u karakterizuan nga “përparim pozitiv”, por pavarësisht vullnetit të shumë vendeve anëtare, një marrëveshje e plotë nuk është finalizuar ende. Pengesa kryesore mbetet kundërshtimi i Belgjikës, e cila ngre shqetësime juridike dhe financiare për mënyrën e shndërrimit të aseteve të ngrira në hua të qëndrueshme.

Përveç kësaj çështjeje, takimet përfshinë edhe diskutimet rreth planit të paqes të propozuar nga Shtetet e Bashkuara. Megjithatë, procesi mbetet i bllokuar, pasi Ukraina ka bërë të qartë se nuk do të heqë dorë nga territoret e saj të pushtuara, pavarësisht presioneve për kompromise të mundshme.

Bisedimet pritet të vazhdojnë në javët në vijim, ndërsa vendet europiane kërkojnë një rrugë të përbashkët që të mbështesë Kievin pa kompromentuar kornizat ligjore ndërkombëtare dhe stabilitetin financiar të Bashkimit Europian.