Limi dhe Alba Pollozhani ndezin rrjetin me akuza dhe mesazhe të koduara

Drama mes Lim Hoti dhe Alba Pollozhani nuk ka përfunduar me mbylljen e Big Brother VIP Kosova. Përkundrazi, përplasjet mes tyre duket se janë zhvendosur në rrjetet sociale, duke mbajtur publikun të fokusuar te çdo detaj.

Dyshja ishte ndër më të komentuarat gjatë qëndrimit në shtëpinë e famshme, për shkak të marrëdhënies së tyre të ndërlikuar. Edhe pse spektakli ka përfunduar për ta, tensioni vazhdon, këtë herë me akuza publike dhe postime që kanë ndezur diskutime.

Së fundmi, Alba hodhi një deklaratë të fortë në InstaStory, duke akuzuar Limin për një situatë që lidhet me Ditën e të Dashuruarve. “Ai shiu s’ka për të të lulëzuar asnjëherë. Përderisa edhe lulet që më bëre dhuratë për Shën Valentin shkove i postove sikur ke femër tjetër me fotografi të vjetër”, shkroi ajo, duke lënë të kuptohet për një veprim që e ka zhgënjyer.

Nga ana tjetër, reagimi i Limit nuk mungoi. Ai publikoi në InstaStory një buqetë me trëndafila të kuq, e ndjekur nga një mesazh që fansat e interpretuan si përgjigje indirekte ndaj ish-partneres së tij. “Mbaj diellin, shpëtoje nga shiu”, shkroi ai në një tjetër postim, duke shtuar edhe më shumë mister rreth situatës.

Ndjekësit kanë nisur menjëherë të analizojnë çdo detaj, duke komentuar se mesazhet e tyre duket se lidhen drejtpërdrejt me njëri-tjetrin. Megjithatë, asnjëri prej tyre nuk ka dhënë një shpjegim të qartë, çka vetëm sa ka rritur interesin.

Sidoqoftë, një gjë është e sigurt: edhe jashtë reality show-t, Lim Hoti dhe Alba Pollozhani vazhdojnë të jenë në kontakt dhe në qendër të vëmendjes, duke dëshmuar se drama e tyre mbetet një nga historitë më të ndjekura të momentit.