Ndahet nga jeta Chris Rea, zëri i pavdekshëm i “Driving Home for Christmas”
Written by radio wave on December 25, 2025
Chris Rea, këngëtari dhe autor i njohur britanik, i cili u bë ikonë e muzikës festive me hitin “Driving Home for Christmas”, ka ndërruar jetë në moshën 74-vjeçare. Lajmi u konfirmua nga familja e tij për agjencinë britanike të lajmeve Press Association.
Sipas deklaratës zyrtare, Rea u shua në spital pas një sëmundjeje të shkurtër. Ikja e tij ka trishtuar fansat e muzikës në mbarë botën, veçanërisht në këtë periudhë festash, kur kënga e tij më e famshme rikthehet çdo vit në playlistat e Krishtlindjes.
Chris Rea u bë i famshëm në vitet ’80 në Britani dhe më gjerë me këngë si “Fool (If You Think It’s Over)” dhe “Let’s Dance”, duke ndërtuar një karrierë të suksesshme dhe të qëndrueshme. Megjithatë, ai do të mbahet mend mbi të gjitha për “Driving Home for Christmas”, një këngë që, ndonëse nuk u bë hit menjëherë pas publikimit në vitin 1986, u kthye me kalimin e viteve në një nga himnet më të dashura festive.
Dy nga albumet e tij studio, “The Road to Hell” në vitin 1989 dhe “Auberge” në vitin 1991, arritën vendin e parë në klasifikimet britanike, duke vulosur statusin e tij si një nga artistët më të rëndësishëm të asaj periudhe.
Chris Rea lindi në vitin 1951 në Middlesbrough, në veriperëndim të Anglisë, nga një baba italian dhe një nënë irlandeze. Pas përfundimit të shkollës, ai punoi në profesione të ndryshme dhe ndihmoi familjen në biznesin e akulloreve. Kitarën e mori për herë të parë në duar në moshën 21-vjeçare, duke luajtur fillimisht në disa grupe përpara se të niste karrierën e tij solo.
Gjatë viteve, Rea u përball me probleme serioze shëndetësore, përfshirë kancerin e pankreasit dhe një goditje në tru në vitin 2016. Në vitet e fundit, ai u largua nga muzika pop, duke iu përkushtuar më shumë tingujve blues, me disa albume të publikuara në këtë zhanër.
Chris Rea la pas bashkëshorten dhe dy vajzat e tij. Trashëgimia e tij muzikore, veçanërisht kënga që shoqëron miliona njerëz në rrugën e kthimit për Krishtlindje, do të vazhdojë të jetojë për shumë vite.
