Nga ekrani te perandoria e stilit – Luana Vjollca tregon sekretin e suksesit të saj në L’Officiel

Luana Vjollca ka rrëfyer për revistën prestigjioze L’Officiel rrugëtimin e saj mbi dy dekada në ekran, filozofinë e vetëbesimit dhe transformimin nga prezantuese televizive në sipërmarrëse dhe ikonë stili. Ajo thekson se çelësi i jetëgjatësisë në industri ka qenë njohja e vlerës së vet dhe guximi për të thënë “jo” kur diçka nuk përputhet me vizionin e saj.

Në intervistë, Luana flet për lindjen e markës së saj LU7U, e cila u kthye shpejt në sukses në Shqipëri dhe jashtë saj, duke u bërë simbol i feminitetit të guximshëm dhe elegant. Ajo zbulon se është e përfshirë personalisht në çdo detaj të biznesit dhe se synon të fuqizojë gratë përmes modës dhe vetëbesimit.

Një tjetër pikë e fortë e rrëfimit është lëvizja “Thuaje”, e lindur natyrshëm nga dëshira për t’u dhënë zë grave dhe vajzave që të shprehen pa frikë. Luana pranon se pas imazhit të fortë ekziston edhe cenueshmëria, por pikërisht kjo është pjesë e rritjes së saj personale.

Sa i përket planeve, ajo paralajmëron projekte të reja në televizion, modë dhe sipërmarrje, përfshirë një fjalim në Festivalin e Modës në Dubai. Mesazhi i saj përfundimtar është i qartë: të punosh fort, të besosh në veten tënde dhe të mos kesh kurrë frikë të synosh majat.