Offset plagoset me armë para një kazinoje në Florida, zbardhen detaje nga incidenti

Reperi i njohur amerikan Offset është plagosur pas një incidenti me armë zjarri që ndodhi para një kazinoje në Florida. Lajmi është konfirmuar nga ekipi i tij, i cili bëri të ditur se artisti ndodhet në spital dhe po merr trajtim mjekësor.

Sipas zëdhënësit të reperit, gjendja e Offset është stabile dhe ai ndodhet nën kujdesin e vazhdueshëm të mjekëve, ndërsa po monitorohet për çdo komplikacion të mundshëm.

Ngjarja ka ndodhur mbrëmjen e kaluar pranë një hoteli dhe kazinoje në Hollywood, Florida. Autoritetet kanë bërë me dije se të shtënat kanë ndodhur në parkingun e objektit, ku më pas i plagosuri është transportuar menjëherë drejt një spitali aty pranë për ndihmë të specializuar.

Policia ka reaguar shpejt duke rrethuar zonën dhe duke e vënë situatën nën kontroll. Dy persona janë ndaluar në lidhje me ngjarjen, ndërsa hetimet vijojnë për të zbuluar se çfarë çoi në këtë incident.

Deri tani nuk është bërë i ditur identiteti i autorit dhe as motivi i sulmit, ndërsa autoritetet kanë theksuar se nuk ka rrezik për publikun dhe se zona është e sigurt.

Offset, emri i vërtetë i të cilit është Kiari Cephus, është një nga anëtarët më të njohur të grupit hip-hop “Migos”. Ky incident ka rikthyer vëmendjen tek tragjedia e vitit 2022, kur anëtari tjetër i grupit, Takeoff, humbi jetën në një tjetër ngjarje me armë zjarri.

Në jetën personale, Offset është baba i tre fëmijëve me reperen Cardi B, me të cilën aktualisht ndodhet në proces divorci.