“POSH SPICE” RIKTHEHET NË NETFLIX: JETA E VËRTETË E VICTORIA BECKHAM, MIDIS LAVDISË DHE LUFTRAVE TË FSHEHTA

Pas suksesit të dokumentarit “Beckham”, Netflix rikthehet me një seri të re që këtë herë fokusohet te Victoria Beckham – nga lavdia me “Spice Girls” te përpjekjet për t’u afirmuar si dizajnere mode. Dokumentari tregon rrugëtimin e saj të vështirë mes famës, pasigurive dhe sfidave që fshiheshin pas imazhit të përsosur.

Victoria rrëfen momentet e errëta pas shpërbërjes së grupit, ndjenjën e vetmisë dhe presionin publik për pamjen e saj. “Më peshuan publikisht gjashtë muaj pas lindjes – sot qesh, por atëherë më shkatërroi,” tregon ajo. Në dokumentar ajo pranon për herë të parë se është përballur me çrregullime në ushqyerje dhe me ndjenja të forta vetëdyshimi.

Në pjesën profesionale, seriali ndalet te fillimet e markës “Victoria Beckham” në 2008, kur bota e modës e priti me skepticizëm. Edhe Anna Wintour, drejtuesja e Vogue, pranon se “nuk besonte plotësisht” në suksesin e saj. Por Victoria e ktheu dyshimin në motivim.

Pas krizave financiare dhe viteve me humbje, marka e saj më në fund doli në fitim në 2022, duke shënuar një kthesë të madhe në karrierën e saj. “Kam gabuar, por nuk jam dorëzuar kurrë,” thotë ajo.

Dokumentari, tashmë i disponueshëm në Netflix, sjell një Victoria më të sinqertë se kurrë – një grua që nga “Posh Spice” u kthye në simbol të forcës, stilit dhe qëndrueshmërisë.