PUTIN RINGJALL FESTIVALIN “INTERVISION” SI ALTERNATIVË NDAJ EUROVISIONIT

Presidenti rus Vladimir Putin po rikthen në skenë një garë të vjetër muzikore sovjetike të quajtur “Intervision”, e cila do të mbahet më 20 shtator në Moskë me pjesëmarrës nga vende kryesisht autoritare si Kina, Venezuela dhe Bjellorusia. Synimi, sipas Putinit, është të krijohet një alternativë ndaj “Eurosongut të zgjuar (woke)” dhe të promovohen “vlera tradicionale, kulturore dhe shpirtërore universale”. Megjithëse Kremlini pretendon se konkursi ka zgjuar interes të madh, raportime të mediave britanike thonë se realiteti është ndryshe: publikut po i ofrohen para për të marrë pjesë në provat gjenerale dhe finalen, ndërsa spektatorëve u ndalohet të veshin ngjyrat kombëtare të Ukrainës, xhinse të grisura apo rroba me logo.

Lista e shteteve pjesëmarrëse përfshin Azerbajxhanin, Bjellorusinë, Venezuelën, Vietnamin, Egjiptin, Indinë, Kazakistanin, Katarin, Kinën, Kolumbinë, Kubën, Kirgistanin, Emiratet e Bashkuara Arabe, Rusinë, Arabinë Saudite, Serbinë, SHBA-në, Taxhikistanin, Uzbekistanin dhe Afrikën e Jugut. Serbia do të përfaqësohet nga këngëtari Slobodan Trkulja, SHBA nga Brandon Howard, ndërsa Rusia nga këngëtari patriotik Shaman (Jaroslav Dronov, 33 vjeç), i njohur për qëndrimet e tij pro-luftës. Historikisht, “Intervision” u mbajt mes viteve 1965–1968 dhe më pas 1977–1980 si kundërpeshë ndaj Eurovisionit, por përpjekja për ta ringjallur në vitin 2008 dështoi. Këtë herë, Putin duket ta përdorë atë si mjet politik për të treguar se Rusia nuk është e izoluar për shkak të luftës në Ukrainë dhe sanksioneve perëndimore. Nuk dihet nëse Putin do të ngjitet vetë në skenë, siç bëri në vitin 2010 kur u bë viral duke kënduar “Blueberry Hill” përballë yjeve të Hollywood-it. Rusia ka marrë pjesë në Eurovision nga viti 1994 deri më 2021, duke fituar në 2008 me Dima Bilan dhe këngën “Believe”. Në vitin 2009 Moska organizoi garën, ndërsa në vitin 2022 Rusia u përjashtua pas pushtimit të Ukrainës.