RADIO WAVE – INTERVISTË ME ARJETA DHIMËN: “KUSH FOLI?” – NJË SHFAQJE QË FLET ME ZËRAT E JETËS

Në studion e Radio Wave, këtë herë mikpritëm një artiste unike që po sjell një risi absolute në skenën shqiptare — Arjeta Dhima, regjisore, mentore e suksesit dhe e folurit në publik, por mbi të gjitha ventrilokuistja e parë dhe e vetme në Shqipëri.

Arjeta na tregoi për shfaqjen e saj më të re, “Kush Foli?”, që do të mbahet më 22 tetor në ArtTurbina. Një mbrëmje ku publiku nuk do të jetë thjesht spektator, por pjesë e historisë që ndodh në skenë. Ajo zbuloi se do të ngjiten në skenë pesë personazhe kukulla, secili me personalitetin e vet të spikatur, duke krijuar një atmosferë plot humor, energji dhe reflektim.

“Kjo është një shfaqje argëtuese, por që përcjell edhe mesazhe të bukura për jetën. Publiku do të ndiejë emocione, do të qeshë, por edhe do të mendojë,” – tha Arjeta në intervistë.

Ajo rrëfeu se përgatitja e një shfaqjeje të tillë kërkon rreth një vit punë, pasi ventrilokuizmi është një art kompleks që bashkon zërin, humorin dhe skenarin në një sinkron të përsosur.

Arjeta shprehu mirënjohjen e saj për publikun shqiptar që e ka përqafuar me dashuri dhe kuriozitet këtë formë arti të rrallë. Sipas saj, personazhet e rinj janë më të skalitur, më aktualë dhe me më shumë jetë, çka e bën “Kush Foli?” një eksperiencë krejt ndryshe nga çdo shfaqje e mëparshme.

Në fund të intervistës, Arjeta premtoi se mbrëmja e 22 tetorit do të jetë një shpërthim emocionesh dhe adrenaline, një event që ndodh vetëm një herë — dhe që askush nuk duhet ta humbasë!

“Kush Foli?” – ArtTurbina, 22 Tetor – Një zë i ri në artin shqiptar që flet pa hapur gojën!