Rihanna “vjedh” vëmendjen në koncertin e Mariah Carey: Një reagim që bëri xhiron e rrjetit

Rihanna u përball me një moment të papritur, por tipikisht “Rihanna”, gjatë një mbrëmjeje që duhej t’i përkiste plotësisht Mariah Carey-t. Ikona botërore e muzikës ishte e pranishme më 13 dhjetor në koncertin e divës së Krishtlindjeve, brenda teatrit Dolby në Park MGM në Las Vegas, dhe emocionet duket se e morën përpara.

E ulur mes publikut, këngëtarja nga Barbadosi u ngrit në këmbë sapo Carey nisi performancën, duke kërcyer, tundur krahët dhe duke i dërguar puthje autores së hitit “All I Want For Christmas”. Në një moment, gjatë interpretimit të këngës “We Belong Together”, Rihanna ishte aq e përfshirë sa u mbështet në karrigen e saj, duke ia vështirësuar pamjen personit që ndodhej pas saj.

Situata mori një kthesë interesante kur një fans i kërkoi asaj të ulej, moment që u kap në video dhe u përhap me shpejtësi në rrjetet sociale. Por ndryshe nga sa mund të pritej, Rihanna nuk reagoi me ndjesë. Përkundrazi, mega ylli iu përgjigj spontanisht dhe pa filtra me fjalët: “Oh, dreq!”, një reagim që ndezi menjëherë komentet online.

Manjatja e “Fenty”, e cila është nënë e tre fëmijëve me partnerin e saj A$AP Rocky, u komentua gjerësisht për qëndrimin e saj të lirë dhe energjinë e pakursyer. Për disa, reagimi ishte thjesht shprehje entuziazmi të pastër për një artiste që ajo admiron, ndërsa për të tjerë, një moment i diskutueshëm në një event publik.

Sidoqoftë, një gjë është e sigurt: edhe kur është thjesht një spektatore, Rihanna di si të bëjë lajm. Dhe këtë herë, pa qenë në skenë, ajo arriti sërish të rrëmbejë vëmendjen.