Rrjedhje uji në Muzeun e Luvrit dëmton qindra dokumente studimore: rikthehen shqetësimet për infrastrukturën

Një incident i pazakontë ka goditur Muzeun e Luvrit në fund të nëntorit, ku një rrjedhje uji ka shkaktuar dëme në 300–400 materiale studimore të departamentit egjiptian. Bëhet fjalë kryesisht për revista dhe dokumente shkencore, të përdorura nga studiues dhe ekspertë të fushës.

Pavarësisht dëmit të shkaktuar, muzeu ka njoftuar se asnjë artefakt i trashëgimisë kulturore nuk është dëmtuar në mënyrë të pariparueshme. Materialet e prekura po i nënshtrohen procesit të tharjes dhe restaurimit, për t’u rikthyer në gjendje të përdorshme.

Ngjarja ka ringjallur diskutimet rreth infrastrukturës së vjetëruar të muzeut, e cila prej kohësh është në qendër të kritikave. Vetëm pak muaj më parë, Luvri u përball me një tjetër incident të rëndë: vjedhjen e bujshme të bizhuterive, që ngriti pikëpyetje serioze mbi masat e sigurisë.

Rrjedhja e fundit e ujit ka shtuar presionin mbi drejtuesit e institucionit, të cilët tashmë përballen me thirrje të reja për investime urgjente në mirëmbajtjen dhe modernizimin e muzeut.