SABRINA CARPENTER DOMINON LISTAT MUZIKORE ME ALBUMIN E RI “MAN’S BEST FRIEND”

Vetëm disa ditë pas publikimit më 29 gusht, Sabrina Carpenter ka arritur sukses të jashtëzakonshëm me albumin e saj të shtatë, “Man’s Best Friend”. Projekti i ri e ka pozicionuar këngëtaren 26-vjeçare në vendet më të larta të listave muzikore ndërkombëtare.

Albumi u regjistrua fshehurazi në pronën private Soho Farmhouse në Cotswolds, ku një natë qëndrimi kushton mbi 5,700 funte (rreth 6,530 euro). Në këtë mjedis luksoz, Carpenter dhe ekipi i saj krijuan një studio të improvizuar për seancat e regjistrimit, duke punuar intensivisht në materialin e ri.

Megjithëse kopertina e albumit shkaktoi polemika për shkak të natyrës provokuese, suksesi muzikor ka tejkaluar çdo debat. Sipas Official Charts, kënga “Tears” është ngjitur në vendin e dytë, “My Man On Willpower” në të katërtin dhe “Sugar Talking” në të gjashtin, duke dëshmuar popullaritetin e madh të projektit.

Sabrina ka ndarë në rrjetet sociale pamje nga prapaskenat e regjistrimeve dhe detaje të kopertinës, duke rritur entuziazmin e fansave. Albumi përfshin bashkëpunime me producentë të njohur, mes tyre Jack Antonoff, ndërsa kënga kryesore “Manchild” ka arritur menjëherë vendin e parë në Spotify, si në SHBA ashtu edhe globalisht.

Me këtë sukses të ri, Carpenter forcon statusin e saj si një nga artistet më të kërkuara të momentit në industrinë muzikore.