SEAN “DIDDY” COMBS PRET DËNIMIN PËRFUNDIMTAR PAS GJYQIT TË BUJSHËM

Gati tre muaj pasi përfundoi gjyqi i tij, Sean “Diddy” Combs, 55 vjeç, do të mësojë këtë javë dënimin që do të përcaktojë fatin e tij. Reperi u arrestua në shtator të vitit të kaluar në hollin e hotelit Park Hyatt në Manhattan dhe u përball me gjyqin në maj për një sërë akuzash që mbulojnë më shumë se tre dekada, raporton Unilad. Akuzat përfshinin trafikim qeniesh njerëzore për shfrytëzim seksual, shantazh dhe transportim për qëllime prostitucioni, ndërsa ai dhe bashkëpunëtorët e tij dyshohej se kërcënonin viktimat me dhunë ose kaseta komprometuese.

Pas një procesi shtatë-javor, juria shpalli vendimin në korrik: Combs u shpall fajtor për dy akuza për transportim me qëllim prostitucioni, një krim federal sipas Aktit Mann, i cili ndalon transportimin e një personi përtej kufijve shtetërorë për aktivitet seksual të paligjshëm, edhe nëse ekziston pëlqim. Ai u lirua nga akuzat më të rënda për trafikim dhe shantazh. Çdo akuzë sipas Aktit Mann mbart deri në 10 vjet burg, që do të thotë se reperi përballet teknikisht me një dënim maksimal prej 20 vitesh. Megjithatë, prokurorët kanë kërkuar një dënim prej katër deri në pesë vjet, raporton Sky News.

Nga ana tjetër, ekipi i mbrojtjes ka apeluar vendimin dhe kërkon një dënim jo më shumë se 14 muaj, duke theksuar se Combs ka kaluar tashmë mbi një vit në paraburgim federal dhe se karriera, reputacioni e trashëgimia e tij janë “shkatërruar plotësisht”. Vendimi përfundimtar do të jepet këtë të premte, më 3 tetor. Edhe pse teorikisht përballet me deri në dy dekada burg, dënimi real pritet të jetë dukshëm më i shkurtër, duke marrë parasysh periudhën e kaluar tashmë në paraburgim.