TAYLOR SWIFT RRËZON ADELEN: “SHOWGIRL” THYEN REKORDIN HISTORIK TË “HELLO”

Taylor Swift ka bërë sërish histori në muzikë. Vetëm pesë ditë pas publikimit, albumi i saj më i ri “The Life of a Showgirl” ka kaluar shifrën prej 3.5 milionë shitjesh të barasvlershme në SHBA, duke tejkaluar rekordin që Adele kishte vendosur një dekadë më parë me “25” dhe këngën e famshme “Hello”.

Sipas Billboard, nga këto shifra marramendëse, rreth 3.2 milionë janë blerje të plota të albumit – një arritje e rrallë në epokën e streaming-ut – ndërsa 2.7 milionë ndodhën që në ditën e parë të publikimit. Edhe pse reagimet e kritikëve kanë qenë të përziera, me nota që variojnë nga 5.9/10 në Pitchfork deri në dy yje nga The Guardian, fansat e Swift mbeten të pandalshëm.

Për promovimin e albumit, këngëtarja publikoi edhe një dokumentar 89-minutësh në kinema, i cili solli 33 milionë dollarë vetëm nga shitjet e biletave në SHBA dhe Kanada – duke kaluar madje edhe filmin më të fundit të Dwayne “The Rock” Johnson.

Albumi ka shënuar gjithashtu një rekord të ri në formatin vinyl, me 1.2 milionë kopje të shitura – më shumë se çdo album tjetër në historinë moderne të muzikës. Siç duket, Taylor Swift nuk njeh kufij, as në kreativitet, as në shitje.