Të shtëna drejt shtëpisë së Rihannës, arrestohet një grua

Momente tensioni janë regjistruar pranë shtëpisë së superyllit të muzikës pop Rihanna në Beverly Hills, pasi një grua dyshohet se ka qëlluar disa herë me armë drejt pronës së saj.

Sipas raportimeve të The Guardian dhe mediave amerikane, incidenti ndodhi të dielën kur rreth 10 të shtëna u qëlluan nga një automjet i ndalur përballë portës së rezidencës së artistes. Njëri prej plumbave raportohet se ka depërtuar përmes një muri të shtëpisë.

Autoritetet e Los Angeles Police Department reaguan menjëherë pas telefonatës për të shtëna, rreth orës 13:21, dhe arrestuan një grua 30-vjeçare të dyshuar për sulmin.

Sipas mediave lokale, këngëtarja ndodhej në shtëpi në momentin e incidentit, por për fat të mirë nuk ka pasur persona të lënduar.

Deri tani, policia dhe përfaqësuesit e artistes nuk kanë dhënë një deklaratë zyrtare lidhur me motivet e mundshme të të shtënave, ndërsa hetimet për ngjarjen vijojnë.