TIRANA E KULLAVE TË LARTA, JATAGANI: “BALLKONI I KUKËSIT” NË ANKAND, ÇUNAT E LONDRËS TË INTERESUAR!

Gjatë një interviste të zjarrtë në “Wave Breakfast Show”, eksperti i imobiliareve Mandi Jatagani hodhi dritë mbi transformimin e Tiranës në një qytet të mbushur me kulla moderne dhe investitorë të mëdhenj. I pyetur nga moderatori Ergys Bamci për kullat më të bukura në kryeqytet, Jatagani dha një përgjigje intriguese: “Kemi kulla për natën edhe për ditën, të gjitha janë interesante”.
Një detaj veçanërisht i spikatur nga biseda ishte ai që lidhej me një nga kullat më të përfolura të momentit, “Downtown”. Jatagani zbuloi se ballkoni i njohur si “Ballkoni i Kukësit”, së bashku me apartamentin e tij, është vënë në ankand dhe se mes të interesuarve për ta blerë janë pikërisht “çunat e Londrës”. Ky informacion ka ngjallur një valë spekulimesh për atë që pritet të ndodhë me këtë hapësirë elitare në zemër të Tiranës.

Por kjo nuk është e gjitha! Sipas Jataganit, në Tiranë po ndërtohen mbi 10 kulla të tjera, duke e shndërruar qytetin në një qendër moderne të arkitekturës dhe një magnet për investimet e huaja. Ky zhvillim i vrullshëm tregon se tregu imobiliar në kryeqytet nuk njeh ngadalësim.
Kur u pyet nga Bamci se si do ta ndërtonte një kullë për veten e tij, Jatagani nuk hezitoi të jepte një përgjigje kreative: “Do e ndërtoja në formën e shkronjës ‘M'”. Ky detaj i shton edhe më shumë hijeshi debatit mbi arkitekturën e re të Tiranës dhe vizionin e tij për të ardhmen e qytetit.

Duke parë këtë prurje të re kullash dhe investimesh, ekspertët po paralajmërojnë një epokë të artë për tregun imobiliar shqiptar. A do të jetë “Ballkoni i Kukësit” pronë e “çunave të Londrës”? Cila do të jetë kulla më ikonike e së ardhmes? Mbetet për t’u parë!