Tronditje në muzikën shqiptare: Ndërron jetë në moshën 40-vjeçare këngëtari i njohur Shpat Kasapi

Bota e showbiz-it shqiptar është zhytur në zi. Këngëtari i dashur nga Tetova, Shpat Kasapi, ka ndërruar jetë tragjikisht në moshën vetëm 40-vjeçare. Mediat maqedonase raportojnë se artisti humbi jetën si pasojë e një arresti kardiak teksa ndodhej në Itali, duke lënë pas një boshllëk të madh për fansat dhe familjen e tij.

Lajmi ka tronditur publikun, pasi Shpati ishte një nga fytyrat më të njohura dhe më të dashura të skenës sonë muzikore. I lindur më 1 maj 1985 në Tetovë, ai vinte nga një familje me traditë muzikore, gjë që e orientoi drejt artit që në moshë të vogël. Në fillim të viteve 2000, ai shpërtheu në skenë me hite që shumë shpejt e kthyen në një idhull të rinisë në gjithë hapësirën shqiptare.

Karriera e tij ishte e mbushur me këngë që u kënduan, u pëlqyen dhe u bënë pjesë e kujtimeve të një brezi të tërë. Zëri i tij i butë, stili i veçantë dhe karizma e natyrshme e bënë Shpat Kasapin një ikonë të pop-it shqiptar të viteve 2000.

Pas vetes, Shpati lë djalin e tij, Roar, fryt i marrëdhënies me ish-bashkëshorten Selvije Jao. Ndërsa arti i tij do të jetojë, humbja e tij e parakohshme mbetet një plagë e rëndë për familjarët, miqtë dhe publikun që e deshi.

Showbiz-i shqiptar sot heshti.
Shpat Kasapi do të kujtohet gjithmonë për muzikën, shpirtin e gëzuar dhe ndikimin që la në zemrat e të gjithëve.